Բողոքի ակցիա Բրանդենբուրգյան դարպասների առջև՝ հայ պատանդների ազատ արձակման պահանջով
Երեկ Բեռլինի կենտրոնում՝ Բրանդենբուրգյան դարպասների առջև, տեղի է ունեցել Բաքվում կալանավորված ռազմագերիների, պատանդների ազատ արձակման պահանջով բողոքի ակցիա։
Իրավապաշտպան կազմակերպությունները, ակտիվիստները և մտահոգ քաղաքացիները հավաքվել էին՝ պահանջելու անհապաղ ազատ արձակել Ադրբեջանում ապօրինաբար կալանավորված հայ քաղբանտարկյալներին։
Բողոքի ցույցը կազմակերպել էին «Գերմանահայոց կենտրոնական խորհուրդը», «Վտանգված ազգերի ընկերակցությունը», «Ցեղասպանության ճանաչման հանձնախումբը», «Մարդու իրավունքների միջազգային ընկերակցությունը», «Ազատ հայ պատանդների դեմ» քաղաքացիական շարժումը։
«Ձերբակալվածները, այդ թվում՝ Ռուբեն Վարդանյանը, գտնվում են անմարդկային պայմաններում և հայտնում են խոշտանգումների և դաժան վերաբերմունքի մասին։ Վարդանյանն այս պահին հացադուլի մեջ է և նրա կյանքին լուրջ վտանգի է սպառնում։
«Մենք չենք կարող լռել», - ասել է Գերմանահայոց կենտրոնական խորհրդի ատենապետ Յոնաթան Շպանգենբերգը: Ցուցարարներն ընդգծել են, որ Ադրբեջանի գործողությունները խախտում են միջազգային իրավունքը, այդ թվում՝ ՄԱԿ-ի ցեղասպանության կոնվենցիան և Մարդու իրավունքների եվրոպական կոնվենցիան:
Ցուցարարները կոչ են արել Եվրամիությանը, Գերմանիային և Ֆրանսիային պատժամիջոցներ սահմանել Ադրբեջանի պաշտոնյաների, հայ բանտարկյալների անօրինական կալանավորման և բռնության համար պատասխանատու անձանց դեմ։ ՄԱԿ-ի Խոշտանգումների դեմ կոմիտեին և Միջազգային Կարմիր Խաչին հնարավորություն տալ գնահատելու բանտարկյալների նկատմամբ վերաբերմունքը, պահանջել Ադրբեջանից կատարել մարդու իրավունքների միջազգային պարտավորությունները և ազատ արձակել քաղբանտարկյալներին առանց որևէ պայմանի, Արցախում հայկական մշակութային և կրոնական վայրերի հետագա ոչնչացման հետազոտություն և կանխարգելում կատարել, հնարավորություն տալ հայերին վերադառնալ իրենց հայրենիք:
Բողոքի մասնակիցները դատապարտել են Եվրոպայի անգործությունը, ընդ որում Յոնաթան Շպանգենբերգը նշել է Գերմանիայի պատմական պատասխանատվությունը՝ կանխելու ցեղասպանությունը և պաշտպանելու խոցելի համայնքները: Նա քննադատել է կանցլեր Օլաֆ Շոլցի կողմից վճռական քայլերի ձախողումը և կոչ է արել պաշտոնական բողոք ներկայացնել Միջազգային քրեական դատարան՝ ընդդեմ Ադրբեջանի նախագահ Իլհամ Ալիևի։
Մարդու իրավունքներով զբաղվող կազմակերպությունների կոալիցիան նախատեսում է հետագա ցույցեր Եվրոպայում եւ պաշտոնական միջնորդություն կներկայացնի Եվրոպական խորհրդարան՝ կոչ անելով անհապաղ պատժամիջոցներ կիրառել Ադրբեջանի դեմ:
Բողոքի ակցիայի կազմակերպիչները նաեւ կոչ են արել Եվրոպայի քաղաքացիներին բարձրացնել իրազեկվածությունը եւ ճնշում գործադրել իրենց կառավարությունների վրա՝ գործելու մարդու իրավունքների այս կոպիտ խախտումների դեմ:
Աղբյուրը՝ Yerkir.am
